「萬幾銀伙食」的文章

王亭之喜食，但絕非食家，非三代富貴不足以言飲食，王亭之豈足以當之耶，所以雖有人約王亭之寫食經，王亭之決不敢應承。

老實說，寫食經實在是虧本生意，每日寫幾百字，給閣下一百元稿費已經非常之俾面，拿住一百元，大概只可以食兩碟小菜，一碗例湯，評鬼評馬咩。虧本的生意，王亭之從來不做，是故不寫食經乃天公地道的事。

但王亭之亦曾聽過在一本八卦周刊寫食經的人晒命曰：「我二千幾蚊人工，萬幾銀伙食。」這萬幾銀，連稅都不必抽，實在令人艷羡，晒命真晒得過。

王亭婆為此亦曾勸過王亭之寫食經，其言曰：「萬幾銀伙食，寫得過也。」

不過王亭之自知絕非此材料，因此雖然流口水，亦自嘆命不如人而已。你以為這類「萬幾銀伙食」的文章好易寫耶？非也非也。

許多酒家，用鏡架鑲起一兩篇「萬幾銀伙食」的文章，亦有將之影印過膠，夾在「菜譜」之內，足見其受重視的程度，文章最怕受人如此重視，可見其難寫矣。

有一篇「萬幾銀伙食」的文章，介紹一種冇人識炮製的雞，據稱乃是古法，已經失傳，唯有某酒樓識製云云。

但王亭之翻遍寒舍所藏的古代食譜，偏偏找不到此雞的名號，難怪失傳矣，莫非古到春秋戰國時期耶？因此，對「萬幾銀伙食」的文章便非常之佩服，光是考據工夫就已經一流，倘如未經考據，點知道此乃屬「古法」，又點知道天下之大，只有某酒家識整也。

王亭之的伙食費非常之寒儉，多吃家常小菜，但覺家常小菜倘能留意一些小節，其味亦不遜珍饈，所以倘如叫王亭之寫食經，斷斷不可能有「萬幾銀伙食」，獻醜不如藏拙，其斯之謂也。

王亭之談食
出版日期：一九八七年二月