坎坎胡
同文金言老弟約王亭之食大閘蟹，並邀兩位又靚又乖的世侄女作陪，一個是梁多玲，一個是「就咁話」。
梁多玲是港灣東海的顧問，當然約返在自己的鋪頭，更何況王亭之喜食此店的黄麻沙糍，順理成章之至也。
是夕點菜，由「就咁話」發辦，因為梁多玲點菜必替主人慳荷包，王亭之不悅。「就咁話」點高湯海虎翅，謂該店的上湯甚靚，王亭之啖後，賞其清，而嫌稍欠腿汁，不過口味各人不同，略多腿汁，世侄女又會話鹹矣。
梁多玲則曰：「亭老知否你的世侄女好慘也？」王亭之以為她有甚麼大不了，多玲曰：「啋，唔係我，係孫精工的左右手伊雲德，佢在隔籬房打麻雀，輸了六十幾底。所以今晚的高湯如果叫她飲，就算推足一隻火腿的腿汁，應該都冇乜味。」
語畢，金言老弟大笑，讚多玲姑娘夠膽窒王亭之。「就咁話」曰：「其實香港應該出一本食譜，目的不是教人整菜，而是教人點菜，介紹那一家酒家的上湯最靚，那一家酒家有甚麼名菜，食家即可按圖索驥。」
金言老弟曰：「有丫，有一本《香港中菜精華》，即專門介紹五十多家一流食府的拿手菜色，每週試一間，一年食唔齊也。」
王亭之曰：「可惜這本書的廣告卻未突出這點，老弟不提，連老拙都未想到可將此書作為飲食指南之用，因為直覺上會覺得此乃教人烹飪的書，家庭主婦可能會自問手藝不及名廚，不感興趣。」
「就咁話」於是提議，找十二個人埋份會，每週開一次，輪流試食名廚，王亭之笑曰：「如果由你大忙人主會，大慨一年一會差不多。」
讀者一定會問，「就咁話」是誰，此乃周錦華也。
王亭之談食
出版日期：一九八七年二月
